ಶಿವಮೊಗ್ಗ: ದುಬೈನಿಂದ ಕಡಿಮೆ ಬೆಲೆಗೆ ಐಫೋನ್ ಕೊಡಿಸುವುದಾಗಿ ನಂಬಿಸಿ ಮಹಿಳಾ ಇಂಜಿನಿಯರ್ ಒಬ್ಬರಿಗೆ ಲಕ್ಷಾಂತರ ರೂಪಾಯಿ ಹಣ ಪಡೆದು ವಂಚಿಸಲಾಗಿದೆ.
ಮಹಿಳಾ ಇಂಜಿನಿಯರ್ ಒಬ್ಬರಿಗೆ ಇನ್ಸ್ಟಾಗ್ರಾಮ್ ಮೂಲಕ ಸುನಿಲ್ ಎಂಬಾತನ ಪರಿಚಯವಾಗಿತ್ತು. ಆತ ತಾನು ಕ್ರಷರ್ ಮಾಲೀಕನೆಂದು ಪರಿಚಯಿಸಿಕೊಂಡಿದ್ದ. ದುಬೈನಿಂದ ಕಡಿಮೆ ಬೆಲೆಗೆ ಐಫೋನ್ 17 ಪ್ರೋ ಮ್ಯಾಕ್ಸ್ ಮೊಬೈಲ್ ತರಿಸಿಕೊಡುವುದಾಗಿ ನಂಬಿಸಿದ್ದ.
ಆತನ ಮಾತು ನಂಬಿದ ಇಂಜಿನಿಯರ್, ಕಳೆದ ಮಾರ್ಚ್ ಹಾಗೂ ಏಪ್ರಿಲ್ ತಿಂಗಳಲ್ಲಿ ವಿವಿಧ ಕಂತುಗಳಲ್ಲಿ ಒಟ್ಟು ₹1,34,000 ಹಣವನ್ನು ಆತನಿಗೆ ಆನ್ಲೈನ್ ಮೂಲಕ ಕಳುಹಿಸಿಕೊಟ್ಟಿದ್ದರು. ಆದರೆ, ಹಣ ಪಡೆದ ಬಳಿಕ ಆರೋಪಿ ಮೊಬೈಲ್ ಕೊಡಿಸದೆ ನಾನಾ ಸಬೂಬು ಹೇಳಿ ಸತಾಯಿಸಲು ಆರಂಭಿಸಿದ್ದ ಎಂದು ಆರೋಪಿಸಲಾಗಿದೆ.
ವಂಚನೆಗೊಳಗಾದ ಇಂಜಿನಿಯರ್ ತಮ್ಮ ಹಣ ವಾಪಸ್ ಕೇಳಿದಾಗ, ಆರೋಪಿಯು ಎರಡು ಕಂತುಗಳಲ್ಲಿ ಒಟ್ಟು ₹54,000 ಹಣವನ್ನು ಮಾತ್ರ ಹಿಂದಿರುಗಿಸಿದ್ದಾನೆ. ಇನ್ನುಳಿದ ₹80,000 ಹಣ ನೀಡದೆ ನಾನಾ ಕಾರಣಗಳನ್ನು ನೀಡುತ್ತಾ ವಂಚನೆ ಎಸಗಿದ್ದಾನೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಈ ಸಂಬಂಧ ವಿನೋಬನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
Messenger
WhatsApp