ಶಿವಮೊಗ್ಗ: ಪ್ರಧಾನ ಮಂತ್ರಿಯವರ ಉದ್ಯೋಗ ಸೃಜನ ಯೋಜನೆ (PMEGP) ಅಡಿ ₹5 ಲಕ್ಷ ವೈಯಕ್ತಿಕ ಸಾಲ ಕೊಡಿಸುವುದಾಗಿ ನಂಬಿಸಿ ರೈತರೊಬ್ಬರಿಂದ ₹2,69,800 ಪಡೆದು ವಂಚಿಸಿರುವ ಘಟನೆ ನಡೆದಿದೆ.
ಶಿವಮೊಗ್ಗ ರೈತರೊಬ್ಬರು ಫೇಸ್ಬುಕ್ ನೋಡುತ್ತಿದ್ದಾಗ PMEGP ಯೋಜನೆಯಡಿ ಸಾಲ ನೀಡುವ ಕುರಿತಾದ ವಿಡಿಯೋವೊಂದು ಕಂಡುಬಂದಿತ್ತು. ಅದರಲ್ಲಿ ನೀಡಲಾಗಿದ್ದ ಮೊಬೈಲ್ ಸಂಖ್ಯೆಗೆ ಕರೆ ಮಾಡಿ ತಮಗೆ ₹5 ಲಕ್ಷ ಸಾಲ ಬೇಕೆಂದು ಅವರು ಮನವಿ ಮಾಡಿದ್ದರು. ಕರೆ ಮಾಡಿದಾಗ ಮಾತನಾಡಿದವರು ತಾವು PMEGP ಯೋಜನೆಯ ವಿಭಾಗದಲ್ಲಿ ಕೆಲಸ ಮಾಡುತ್ತಿರುವುದಾಗಿ ನಂಬಿಸಿ, ಸಾಲದ ಹಣ ಬಿಡುಗಡೆ ಮಾಡಲು ಇನ್ಸೂರೆನ್ಸ್, ಮೂರು ತಿಂಗಳ ಇಎಂಐ ಮುಂಗಡ ಪಾವತಿ, ಶೇ.3ರಷ್ಟು ಕಮಿಷನ್ ಹಾಗೂ ತೆರಿಗೆ ಪಾವತಿಸಬೇಕೆಂದು ವಿವಿಧ ಕಾರಣಗಳನ್ನು ನೀಡಿದ್ದರು ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ಇದನ್ನು ನಿಜ ಎಂದು ನಂಬಿದ ಶಿವಮೊಗ್ಗದ ರೈತ ತಮ್ಮ ಬ್ಯಾಂಕ್ ಖಾತೆಗಳಿಂದ ಗೂಗಲ್ ಪೇ ಮತ್ತು RTGS ಮೂಲಕ ಹಂತ-ಹಂತವಾಗಿ ಒಟ್ಟು ₹2,69,800 ಹಣವನ್ನು ಆರೋಪಿಗಳು ಸೂಚಿಸಿದ ಖಾತೆಗಳಿಗೆ ವರ್ಗಾಯಿಸಿದ್ದರು. ಹಣ ಪಡೆದ ನಂತರವೂ ಸಾಲ ನೀಡದೆ, ಮತ್ತೆ ಹೆಚ್ಚಿನ ಹಣ ವರ್ಗಾಯಿಸುವಂತೆ ಆರೋಪಿಗಳು ಪೀಡಿಸಿದಾಗ ದೂರುದಾರರಿಗೆ ಮೋಸ ಹೋಗಿರುವುದು ಅರಿವಾಗಿದೆ. ಘಟನೆ ಸಂಬಂಧ ಶಿವಮೊಗ್ಗದ ಸಿ.ಇ.ಎನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
Messenger
WhatsApp