ಶಿವಮೊಗ್ಗ: ಬಸ್ ಪ್ರಯಾಣದ ವೇಳೆ ಮಹಿಳೆಯೊಬ್ಬರ ಬ್ಯಾಗ್ನಿಂದ ₹3.15 ಲಕ್ಷ ಮೌಲ್ಯದ ಚಿನ್ನಾಭರಣ ಹಾಗೂ ನಗದು ಕಳವಾಗಿರುವ ಘಟನೆ ನಗರದಲ್ಲಿ ನಡೆದಿದೆ. ➤ ಸುದ್ದಿಯ ಮುಂದಿನ 2 ಪ್ಯಾರಾಗಳು ಕೆಳಗಿವೆ.
ಮೈಸೂರಿನ ಪೊಲೀಸ್ ಲೇಔಟ್ ನಿವಾಸಿ ದಾಕ್ಷಾಯಿಣಿ (59) ಹಣ ಮತ್ತು ಒಡವೆ ಕಳೆದುಕೊಂಡವರು. ಮದುವೆ ಕಾರ್ಯಕ್ರಮಕ್ಕೆ ರಾಂಪುರಕ್ಕೆ ಆಗಮಿಸಿದ್ದ ದಾಕ್ಷಾಯಿಣಿ, ಸಾಸ್ವೆಹಳ್ಳಿಯಿಂದ ಹೊನ್ನಾಳಿ ಮಾರ್ಗವಾಗಿ ಕೆಎಸ್ಆರ್ಟಿಸಿ ಬಸ್ನಲ್ಲಿ ಶಿವಮೊಗ್ಗಕ್ಕೆ ಬಂದಿದ್ದರು. ಮಧ್ಯಾಹ್ನ ಶಿವಮೊಗ್ಗ ಬಸ್ ನಿಲ್ದಾಣದ ಸಿಗ್ನಲ್ ಬಳಿ ಇಳಿದು, ಅಲ್ಲಿಂದ ಆಟೋದಲ್ಲಿ ವಿನೋಬನಗರದ ಪೊಲೀಸ್ ಚೌಕಿ ಬಳಿ ತಲುಪಿದ್ದರು. ಆಟೋದಿಂದ ಬ್ಯಾಗ್ ಇಳಿಸಿ ಗಮನಿಸಿದಾಗ ಜಿಪ್ ತೆರೆದಿರುವುದು ಗಮನಕ್ಕೆ ಬಂದಿದೆ. ಪರಿಶೀಲಿಸಿದಾಗ ಕಳ್ಳತನ ಆಗಿರುವುದು ಬೆಳಕಿಗೆ ಬಂದಿದೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ಬ್ಯಾಗ್ನಲ್ಲಿದ್ದ 14 ಗ್ರಾಂ ತೂಕದ ಚಿನ್ನದ ಸರ, 10 ಗ್ರಾಂ ತೂಕದ 5 ಜೊತೆ ಕಿವಿಯೋಲೆ, 9 ಗ್ರಾಂ ತೂಕದ ಎರಡು ಮಕ್ಕಳ ಬ್ರೇಸ್ಲೆಟ್, 6 ಗ್ರಾಂ ತೂಕದ ಪೆಂಡೆಂಟ್, ₹20 ಸಾವಿರ ನಗದು ಹಾಗೂ ಬ್ಯಾಂಕ್ ಲಾಕರ್ ಕೀ, ಎಟಿಎಂ ಕಾರ್ಡ್ ಸೇರಿದಂತೆ ಪ್ರಮುಖ ದಾಖಲಾತಿಗಳು ಕಳ್ಳತನವಾಗಿವೆ. ಬಸ್ನಲ್ಲಿ ಸೀಟಿನ ಕೆಳಗೆ ಬ್ಯಾಗ್ ಇಟ್ಟಿದ್ದ ಸಂದರ್ಭ ಕಳ್ಳರು ಕೃತ್ಯ ಎಸಗಿರಬೇಕು ಎಂದು ದೂರಿನಲ್ಲಿ ಆರೋಪಿಸಲಾಗಿದೆ. ವಿನೋಬನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
Messenger
WhatsApp