ಈಗಿನ ಹೋಬಳಿಗಳು ಆಗ ತಾಲೂಕುಗಳಾಗಿದ್ದವು, ಆಗಿನ ಹೋಬಳಿಗಳು ಈಗ ತಾಲೂಕುಗಳಾಗಿವೆ – ನಮ್ಮೂರು ಶಿವಮೊಗ್ಗ

SHIVAMOGGA LIVE NEWS

NAMMURU SHIVAMOGGA | ರಾಜವಂಶಗಳು ಆಡಳಿತ ಸುಧಾರಣೆಗಾಗಿ ಶಿವಮೊಗ್ಗದ ವಿವಿಧೆಡೆ ಆಡಳಿತ ಕೇಂದ್ರ, ತಾಲೂಕುಗಳನ್ನು ರಚಿಸಿದ್ದವು. ಕೊನೆಗೆ ಇವೆಲ್ಲವು ಒಗ್ಗೂಡಿ ಅಖಂಡ ಶಿವಮೊಗ್ಗ ರಚನೆಯಾಯಿತು. ಇವತ್ತು ಹೋಬಳಿ ಕೇಂದ್ರಗಳಾಗಿರುವ ಪ್ರದೇಶಗಳು ಆಗ ತಾಲೂಕುಗಳಾಗಿದ್ದವು. ಪ್ರಮುಖ ಕೇಂದ್ರ ಸ್ಥಾನವಾಗಿದ್ದವು.

ನಗರ ವಿಭಾಗಕ್ಕೆ ಸೇರಿತ್ತು ಶಿವಮೊಗ್ಗ

ಟಿಪ್ಪು ಸುಲ್ತಾನ್‌ ಯುಗಾಂತ್ಯದ ನಂತರ ಈಗಿನ ಶಿವಮೊಗ್ಗ ಜಿಲ್ಲೆ ಮೈಸೂರು ಒಡೆಯರ್‌ಗಳ ಆಳ್ವಿಕೆಗೆ ಒಳಪಟ್ಟಿತು. ನಗರ (ಈಗಿನ ಹೊಸನಗರದ ನಗರ) ಈ ಭಾಗದ ಫೌಜ್ದಾರಿಯಾಗಿ ಮುಂದುವರೆಯಿತು. ಶಿವಮೊಗ್ಗ ಮತ್ತು ಕಡೂರು ಜಿಲ್ಲೆಗಳನ್ನು ಈ ಫೌಜ್ದಾರಿಗೆ ಸೇರಿಸಲಾಯಿತು. 1862ರಲ್ಲಿ ಶಿವಮೊಗ್ಗ, ಕಡೂರು ಮತ್ತು ಚಿತ್ರದುರ್ಗ ಜಿಲ್ಲೆಗಳನ್ನು ಸೇರಿಸಿ ನಗರ ವಿಭಾಗ ಸ್ಥಾಪಿಸಲಾಗಿತ್ತು. ಈ ಅವಧಿಯಲ್ಲಿ ಕುಂಸಿ ಹೋಬಳಿಯನ್ನು ಶಿವಮೊಗ್ಗದ ಉಪ ತಾಲೂಕು ಎಂದು ಘೋಷಿಸಲಾಗಿತ್ತು.

ಕವಲೆದುರ್ಗವಾಗಿತ್ತು ತೀರ್ಥಹಳ್ಳಿ

ಈಗ ತೀರ್ಥಹಳ್ಳಿ ಅತ್ಯಂತ ಜನಪ್ರಿಯ ತಾಲೂಕು. ಆದರೆ 1882ರವರೆಗೆ ಈ ತಾಲೂಕನ್ನು ಕವಲೆದುರ್ಗ ಎಂದು ಕರೆಯಲಾಗುತ್ತಿತ್ತು. ಆ ಬಳಿಕ ತೀರ್ಥಹಳ್ಳಿ ಎಂಬ ಹೆಸರು ಬಂತು.

ತಾಲೂಕಾಗಿತ್ತು ಈಗಿನ ಆನಂದಪುರ

ಅನಂತಪುರ (ಈಗಿನ ಆನಂದಪುರ) ಈ ಭಾಗದ ಪ್ರಮುಖ ತಾಲೂಕಾಗಿತ್ತು. 1832ರಲ್ಲಿ ನಗರ ತಾಲೂಕು ವಿಸ್ತರಣೆ ಸಂದರ್ಭ ಅನಂತರಪುರ ತಾಲೂಕನ್ನು ಅದರಲ್ಲಿ ವಿಲೀನಗೊಳಿಸಲಾಗಿತ್ತು. ಆದರೆ 1857ರಲ್ಲಿ ಅನಂತಪುರ ತಾಲೂಕನ್ನು ಪುನರ್‌ ಸ್ಥಾಪಿಸಲಾಗಿತ್ತು. ಕೊನೆಗೆ 1875ರಲ್ಲಿ ಸಾಗರ ತಾಲೂಕಿನಲ್ಲಿ ಅನಂತಪುರ ವಿಲೀನವಾಯಿತು.

ಇದನ್ನೂ ಓದಿ – ಈಗ ಸಾಮಾನ್ಯ ಗ್ರಾಮ, ಆಗ ರಾಜಧಾನಿ, ಶಿವಮೊಗ್ಗದ ಯಾವೆಲ್ಲ ಗ್ರಾಮ ಆಡಳಿತ ಕೇಂದ್ರವಾಗಿದ್ದವು? – ನಮ್ಮೂರು ಶಿವಮೊಗ್ಗ

ನಗರದ ಆಡಳಿತ ಕೇಂದ್ರ ಕಲ್ಲೂರುಕಟ್ಟೆಗೆ

ಕೆಳದಿ ಅರಸರು, ಹೈದರಾಲಿ, ಟಿಪ್ಪು ಸುಲ್ತಾನ್‌ ಕಾಲದಲ್ಲಿ ನಗರ ಪ್ರಮುಖ ಆಡಳಿತ ಕೇಂದ್ರವಾತ್ತು. ಆದರೆ 1875ರ ನಂತರ ನಗರದ ಪ್ರಧಾನ ಸ್ಥಳವನ್ನು ಬದಲಾಯಿಸಲಾಯಿತು. ಆಡಳಿತ ಕೇಂದ್ರವನ್ನು ನಗರದ ಬದಲು ಸಮೀಪದ ಕಲ್ಲೂರುಕಟ್ಟೆಗೆ ವರ್ಗಾಯಿಸಲಾಯಿತು. ಆ ಸ್ಥಳ ಈಗ ಹೊಸನಗರ ಎಂದು ಬದಲಾಗಿದೆ.

ಶಿವಮೊಗ್ಗ, ಭದ್ರಾವತಿ ತಾಲೂಕುಗಳ ರಚನೆ

1941ರ ನಂತರ ಆಡಳಿತ ಸುಧಾರಣೆಗಾಗಿ ಭದ್ರಾವತಿ ತಾಲೂಕು ರಚಿಸಲಾಯಿತು. ಭದ್ರಾವತಿ ಹೋಬಳಿ, ಕೂಡ್ಲಿಗೆರೆ ಹೋಬಳಿ, ಹೊಳೆಹೊನ್ನೂರು ಹೋಬಳಿಯ 20 ಗ್ರಾಮಗಳನ್ನು ಸೇರಿಸಿ ಭದ್ರಾವತಿ ಎಂಬ ನೂತನ ತಾಲೂಕು ರಚಿಸಲಾಯಿತು. ಇದೆ ಅವಧಿಯಲ್ಲಿ ಕುಂಸಿ ಉಪ ತಾಲೂಕನ್ನು ಶಿವಮೊಗ್ಗ ತಾಲೂಕಿನ ಜೊತೆಗೆ ವಿಲೀನಗೊಳಿಸಲಾಯಿತು.

ಇದನ್ನೂ ಓದಿ – ಶಿವಮೊಗ್ಗ ಎಂಬ ಹೆಸರು ಬಂದಿದ್ದು ಹೇಗೆ? ಇಲ್ಲಿದೆ ಗೊತ್ತಿರಬೇಕಾದ 2 ಸಂಗತಿ | ನಮ್ಮೂರು ಶಿವಮೊಗ್ಗ

ಹಂತ ಹಂತವಾಗಿ ಶಿವಮೊಗ್ಗ ಜಿಲ್ಲೆ ರಚನೆಯಾಯಿತು. 9 ತಾಲೂಕುಗಳನ್ನು ಜಿಲ್ಲೆ ಒಳಗೊಂಡಿತ್ತು. ಶಿವಮೊಗ್ಗ, ಭದ್ರಾವತಿ, ಚನ್ನಗಿರಿ, ಹೊನ್ನಾಳಿ, ತೀರ್ಥಹಳ್ಳಿ, ಸಾಗರ, ಹೊಸನಗರ, ಸೊರಬ, ಶಿಕಾರಿಪುರ ತಾಲೂಕುಗಳ ಸಹಿತ ಶಿವಮೊಗ್ಗ ಜಿಲ್ಲೆಯಾಗಿತ್ತು.

About The Editor

ನಿತಿನ್‌ ಆರ್‌.ಕೈದೊಟ್ಲು

ಲೋಕಲ್ ಸುದ್ದಿಗಳು ಲೋಕಕ್ಕೆ ತಿಳಿಸಬೇಕು ಅಂತಾ ನ್ಯೂಸ್ ಚಾನೆಲ್ ದುನಿಯಾದಿಂದ ಹೊರ ಬಂದು ಶಿವಮೊಗ್ಗ ಲೈವ್ ಕಟ್ಟಿದ್ದೇವೆ. ಸ್ಥಳೀಯ ಪತ್ರಿಕೆ, ಕೇಬಲ್ ಚಾನೆಲ್, ರಾಜ್ಯಮಟ್ಟದ ಪತ್ರಿಕೆ, ನ್ಯೂಸ್ ಚಾನೆಲ್’ಗಳ ಬೆಂಗಳೂರು ಕಚೇರಿಯಲ್ಲಿ ವರ್ಷಗಟ್ಟಲೆ ಕೆಲಸ ಮಾಡಿದ್ದೇನೆ. ಈ ಫೀಲ್ಡಲ್ಲಿ ಹತ್ತು ವರ್ಷಕ್ಕೂ ಹೆಚ್ಚು ಕಾಲದ ಅನುಭವವಿದೆ. ಹಾಗಾಗಿ ಪೇಪರ್, ಟಿವಿಗಳಿಗಿಂತಲೂ ವಿಭಿನ್ನವಾಗಿ ಸುದ್ದಿ ಕೊಡಬೇಕು ಅನ್ನುವ ಹಂಬಲ. ಅದರ ಪ್ರಯತ್ನ ನಿರಂತರವಾಗಿದೆ.ಕ್ವಾಲಿಟಿ ಮತ್ತು ನಿಖರತೆಗೆ ಮೊದಲ ಆದ್ಯತೆ. ಸುದ್ದಿಯ ಒಳಗೆ ನನ್ನ ಅಭಿಪ್ರಾಯ ಹೇರುವುದಕ್ಕೆ ಇಷ್ಟವಿಲ್ಲ. ಸುದ್ದಿಯನ್ನು ಸುದ್ದಿಯಾಗಷ್ಟೆ ಕೊಡಬೇಕು ಎಂಬುದು ನನ್ನ ವಾದ. ಹೀಗಿದ್ದೂ ಕೆಲವೊಮ್ಮೆ ಸುದ್ದಿ ಕೆಳಗೆ ‘ಡ್ಯಾಷ್ ಡ್ಯಾಷ್ ಡ್ಯಾಷ್’ ಅಂತೆಲ್ಲ ಕಮೆಂಟುಗಳು ಬರುತ್ತವೆ. ಆರಂಭದಲ್ಲಿದ್ದ ಟೆಂಪರ್ ಈಗಿಲ್ಲ. ಹಾಗಾಗಿ ರಿಯಾಕ್ಟ್ ಮಾಡಲ್ಲ..!ನಿಮ್ಮೂರ ಸುದ್ದಿಗಳಿದ್ದರೆ ತಿಳಿಸಿ. ಹಣ ಪಡೆದು ಸುದ್ದಿ ಮಾಡುವ ಹವ್ಯಾಸ, ಅಭ್ಯಾಸ ಎರಡೂ ಇಲ್ಲ. ಇನ್ನಷ್ಟು ವಿಭಿನ್ನ ಪ್ರಯತ್ನಗಳು, ನಮ್ಮೂರನ್ನು ಮತ್ತಷ್ಟು ಸುತ್ತಬೇಕು, ನಮ್ಮೂರ ಬಗ್ಗೆ ತಿಳಿದು ಜನರಿಗೆಲ್ಲ ತಿಳಿಸಬೇಕು ಅನ್ನುವ ತವಕವಿದೆ.ಅಂದಹಾಗೆ, ಹೊಸ ಐಡಿಯಾಗಳಿದ್ದರೆ, ಸಲಹೆಗಳಿದ್ದರೆ ತಿಳಿಸಿ.. ‘ಡ್ಯಾಷ್ ಡ್ಯಾಷ್’ ಬಯ್ಯೋದಿದ್ದರೆ ದಯವಿಟ್ಟು ವಾಟ್ಸಪ್’ನಲ್ಲಿ ಮೆಸೇಜು ಮಾಡಿ, ಸಾಕು..! ನನ್ನ ಮೊಬೈಲ್ ನಂಬರ್ 9964634494. ಸಿಕ್ಕಾಗ ತಪ್ಪದೆ ಮಾತಾಡಿಸಿ. ನಿಮ್ಮ ಸ್ನೇಹ ನಂಗೆ ಅಮೂಲ್ಯ.ಶಿವಮೊಗ್ಗದ ಸುದ್ದಿಗಾಗಿ ನಿರಂತರವಾಗಿ ಶಿವಮೊಗ್ಗ ಲೈವ್.ಕಾಂ ಓದುತ್ತಿರಿ