‘ಎಚ್ಚರ.. ಎಚ್ಚರ.. ಈ ರಸ್ತೆ ಲಿಮ್ಕಾ ದಾಖಲೆಗೆ ಸೇರಲಿದೆ’, ಜನರಿಂದ ಬ್ಯಾನರ್‌, ಎಲ್ಲಿದೆ ಈ ರೋಡ್‌?

ಎಚ್ಚರಿಕೆ ಫಲಕದಲ್ಲಿ ಏನೇನಿದೆ?

ತಾರಿಗ ಗ್ರಾಮಕ್ಕೆ ಬರುವವರಿಗೆ ನಿಷೇಧವಿದೆ. ಗರ್ತಿಕೆರೆಯಿಂದ ತಾರಿಗ ಗ್ರಾಮದವರೆಗೆ ರಸ್ತೆ ಗರ್ಭಿಣಿಯರು, ಮಕ್ಕಳು, ವೃದ್ಧರು, ವಾಹನ ಸವಾರರಿಗೆ ಚಲಿಸಲು ಯೋಗ್ಯವಿಲ್ಲ. ರಸ್ತೆಗೆ ಬಂದು ಬಿದ್ದು ಆಸ್ಪತ್ರೆಗೆ ಸೇರಬೇಡಿ. ಬರುವುದಾದರೆ ನಡೆದುಕೊಂಡೆ ಬನ್ನಿ. ನಮ್ಮೂರ ರಸ್ತೆ ಲಿಮ್ಕಾ ದಾಖಲೆ ಪುಸ್ತಕ ಸೇರುವ ಎಲ್ಲಾ ಸಾಧ್ಯತೆ ಇದೆ. ನಮ್ಮೂರಿಗೆ ರಸ್ತೆ ಇದೆ. ಆದರೆ ಇದು ರಸ್ತೆಯಲ್ಲ. ಇದು ಈ ಭಾಗದ ಗ್ರಾಮ ಪಂಚಾಯಿತಿ ಸದಸ್ಯರು ಮತ್ತು ಶಾಸಕರ ಅಭಿವೃದ್ಧಿಯ ನಿರ್ಲಕ್ಷ್ಯ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಮತ ಹಾಕಲು ಗುರುತಿನ ಚೀಟಿ ಕೊಟ್ಟಿದ್ದಾರೆ

ಮಜಿರೆ ಗ್ರಾಮ ತಾರಿಗ ಗ್ರಾಮ ಅಮೃತ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಒಳಪಡಲಿದೆ. ತೀರ್ಥಹಳ್ಳಿ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿಯ ತಾರಿಗ ಗ್ರಾಮದಲ್ಲಿ ಸುಮಾರು 300 ಜನ ವಾಸವಾಗಿದ್ದಾರೆ. 50 ಮನೆಗಳಿವೆ. ಮತ ಚಲಾಯಿಸಲು ಗುರುತಿನ ಚೀಟಿ ಇರುವುದರಿಂದ ಪ್ರತಿ ಚುನಾವಣೆ ಹೊತ್ತಿಗೆ ಮಾತ್ರ ಅಭ್ಯರ್ಥಿಗಳು ಈ ಊರಿನತ್ತ ಇಣುಕಿ ಹೋಗುತ್ತಾರೆ. ಗೆದ್ದವರು, ಸೋತವರು ಮತ್ತೆ ಇತ್ತ ಸುಳಿಯುವುದಿಲ್ಲ. ಆಧಾರ್‌ ಕಾರ್ಡ್‌ ಸೇರಿ ಎಲ್ಲ ಕಾರ್ಡುಗಳನ್ನು ಸರ್ಕಾರ ವಿತರಿಸಿದೆ.

ಸ್ವಾತಂತ್ರ್ಯ ಬಂದಾಗಿನಿಂದ ಡಾಂಬಾರು ಕಂಡಿಲ್ಲ

ಗರ್ತಿಗೆರೆಯಿಂದ ಒಂದೂವರೆ ಕಿ.ಮೀ ದೂರದಲ್ಲಿದೆ ತಾರಿಗ. ಆದರೆ ಈ ರಸ್ತೆಯಲ್ಲಿರುವ ಉಬ್ಬು, ತಗ್ಗು, ಮೈ ಹಣ್ಣಾಗಿಸುವ ಗುಂಡಿಗಳ ಕಾರಣಕ್ಕೆ ಇಷ್ಟು ದೂರ ಕ್ರಮಿಸಲು ಅರ್ಧ ಗಂಟೆಗು ಹೆಚ್ಚು ಹೊತ್ತು ಬೇಕು. ಇದೇ ಕಾರಣಕ್ಕೆ ಊರಿಗೆ ರಸ್ತೆ ಬೇಕು ಎಂದು ಗ್ರಾಮಸ್ಥರು ಪಟ್ಟು ಬಿಗಿಗೊಳಿಸಿದಾಗ, 2007ರಲ್ಲಿ ಜೆಲ್ಲಿ ಹಾಸಿ, ರೋಲರ್‌ ಹಾಯಿಸಲಾಗಿತ್ತು. ಆ ಬಳಿಕ ಎರಡು ದಶಕವಾದರು ಈ ರಸ್ತೆ ಮತ್ತೆ ಹಿಡಿ ಮಣ್ಣನ್ನೂ ಕಂಡಿಲ್ಲ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.

ಹತ್ತು ವರ್ಷದಿಂದ ಎಲ್ಲರಿಗು ಮನವಿ ಕೊಟ್ಟಿದ್ದೇವೆ. ಆದರೆ ಯಾವುದೆ ಉಪಯೋಗ ಆಗಿಲ್ಲ. ಇದರಿಂದ ಬೇಸತ್ತು ಬ್ಯಾನರ್‌ ಕಟ್ಟಿದ್ದೇವೆ.

ಅರುಣ್‌ ಜಿ.ನಾಯಕ್‌, ಗ್ರಾಮಸ್ಥ

ತುರ್ತು ಸಂದರ್ಭ ಆಂಬುಲೆನ್ಸ್‌ ಬರಲ್ಲ

ರಸ್ತೆಯ ದುಸ್ಥಿತಿಯಿಂದ ಊರಿಗೆ ಬಸ್ಸು ಬರಲ್ಲ. ಆಟೋ, ಗೂಡ್ಸ್‌ ವಾಹನಗಳು ಇತ್ತ ತಿರುಗಿ ನೋಡುವುದಿಲ್ಲ. ಶಾಲೆ ಮಕ್ಕಳು ನಿತ್ಯ ನಡೆದುಕೊಂಡೆ ಹೋಗಬೇಕಿದೆ. ಇನ್ನು, ತುರ್ತು ಸಂದರ್ಭ ಆಂಬುಲೆನ್ಸ್‌ ಕೂಡ ಈ ಊರಿಗೆ ಬರುತ್ತಿಲ್ಲ. ಹಾಗಾಗಿ ರಸ್ತೆಗಾಗಿ ಕಳೆದ ಹತ್ತು ವರ್ಷದಿಂದ ಜನ ಗ್ರಾಮ ಪಂಚಾಯಿತಿಯಿಂದ ಎಂಎಲ್‌ಎ ಮನೆ ತನಕ ಅಲೆದು ಸುಸ್ತಾಗಿದ್ದಾರೆ. ಹಾಗಾಗಿ ಆಕ್ರೋಶಗೊಂಡು ಎಚ್ಚರಿಕೆ ಫಲಕ ಅಳವಡಿಸಿದ್ದಾರೆ.