ಶಿವಮೊಗ್ಗ ಲೈವ್.ಕಾಂ | RIPPONPETE NEWS | 13 ನವೆಂಬರ್ 2021

ಗುಂಡಿ ಮುಚ್ಚಲು ನಿರ್ಲಕ್ಷ್ಯ ವಹಿಸಿದ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳ ವಿರುದ್ಧ ಸಾಮಾಜಿಕ ಕಾರ್ಯಕರ್ತರೊಬ್ಬರು ತೀವ್ರ ಆಕ್ರೋಶ ವ್ಯಕ್ತಿಪಡಿಸಿದ್ದಾರೆ. ಗುಂಡಿ ಪಕ್ಕದಲ್ಲೇ ಚೇರ್ ಹಾಕಿಕೊಂಡು ಕುಳಿತು ವಾಹನ ಸವಾರರಿಗೆ ಗುಂಡಿಗಳಿವೆ ಜೋರಾಗಿ ಕೂಗಿ ಎಚ್ಚರಿಸಿ ವಿಭಿನ್ನ ರೀತಿಯಲ್ಲಿ ಪ್ರತಿಭಟನೆ ನಡೆಸಿದರು.

ರಿಪ್ಪನ್ ಪೇಟೆ ಸರ್ಕಲ್’ನಲ್ಲಿ ಸಾಮಾಜಿಕ ಕಾರ್ಯಕರ್ತ ಟಿ.ಆರ್.ಕೃಷ್ಣಪ್ಪ ವಿಭಿನ್ನ ರೀತಿಯಲ್ಲಿ ಹೋರಾಟ ನಡೆಸಿದರು.

ಗುಂಡಿ ಪಕ್ಕದಲ್ಲೆ ಕುಳಿತರು

ಟಿ.ಆರ್.ಕೃಷ್ಣಪ್ಪ ಅವರು ಗುಂಡಿ ಪಕ್ಕದಲ್ಲೆ ಚೇರ್ ಹಾಕಿ ಕುಳಿತು ಘೋಷಣೆ ಕೂಗಿದರು. ವಾಹನ ಸವಾರರಿಗೆ ಎಚ್ಚರಿಕೆ ನೀಡಿದರು. ಇದೆ ವೇಳೆ ಮಾಧ್ಯಮದವರೊಂದಿಗೆ ಮಾತನಾಡಿದ ಟಿ.ಆರ್.ಕೃಷ್ಣಪ್ಪ ಅವರು, ‘ರಿಪ್ಪನ್’ಪೇಟೆ ದೂರದೂರುಗಳಿಂದ ಜನರು ಬರುತ್ತಾರೆ. ಇಲ್ಲಿರುವ ಗುಂಡಿಗಳಿಂದಾಗಿ ಹಲವರು ಬಿದ್ದು ಗಾಯಗೊಂಡಿದ್ದಾರೆ. ಮೊನ್ನೆ ಒಬ್ಬ ಹಳ್ಳಿ ಹುಡುಗ ಬಂದು ಬಿದ್ದು ನೋವು ಅನುಭವಿಸಿದ್ದಾನೆ. ಇದನ್ನು ಕೇಳಿ ನೋವಾಯಿತು. ಹಾಗಾಗಿ ಜನರನ್ನು ಎಚ್ಚರಿಸಲು ಹೋರಾಟ ನಡೆಸುತ್ತಿದ್ದೇನೆ’ ಎಂದು ತಿಳಿಸಿದರು.

ಇನ್ನೆರಡು ದಿನ ಗಡುವು

ರಿಪ್ಪನ್’ಪೇಟೆ ಸರ್ಕಲ್’ನಲ್ಲಿರುವ ಗುಂಡಿಗಳನ್ನು ಇನ್ನೆರಡು ದಿನದಲ್ಲಿ ಮುಚ್ಚಬೇಕು ಎಂದು ಟಿ.ಆರ್.ಕೃಷ್ಣಪ್ಪ ಗಡುವು ನೀಡಿದ್ದಾರೆ. ‘ಇನ್ನೆರಡು ದಿನದಲ್ಲಿ ಗುಂಡಿಗಳನ್ನು ಮುಚ್ಚದೆ ಹೋದರೆ, ಅಧಿಕಾರಿಗಳ ವಿರುದ್ಧ ಪ್ರಕರಣ ದಾಖಲು ಮಾಡುತ್ತೇನೆ’ ಎಂದು ಎಚ್ಚರಿಸಿದ್ದಾರೆ.

ಸಾಮಾಜಿಕ ಹೋರಾಟಗಾರ ಟಿ.ಆರ್.ಕೃಷ್ಣಪ್ಪ ಅವರ ಹೋರಾಟಕ್ಕೆ ಸ್ಥಳೀಯರು, ವ್ಯಾಪಾರಿಗಳು ಬೆಂಬಲ ವ್ಯಕ್ತಪಡಿಸಿದ್ದಾರೆ.