ಸಿಗಂದೂರು ಸೇತುವೆ, ರೈಲ್ವೆ ಯೋಜನೆ, ವಿಮಾನ ನಿಲ್ದಾಣ ಬಗ್ಗೆ ಸಂಸದ ರಾಘವೇಂದ್ರ 5 ಪ್ರಮುಖ ವಿಷಯ ಪ್ರಸ್ತಾಪ

SHIVAMOGGA LIVE NEWS | 18 DECEMBER 2023

SHIMOGA : ವಿಮಾನ ನಿಲ್ದಾಣದಲ್ಲಿ ನೈಟ್‌ ಲ್ಯಾಂಡಿಂಗ್‌ ಮತ್ತು ಮಂಜು ಮುಸುಕಿದ ವಾತಾವರಣ ಇದ್ದಾಗಲೂ ಸುಲಭವಾಗಿ ಲ್ಯಾಂಡ್‌ ಆಗಲು ಅಗತ್ಯವಿರುವ ಉಪಕರಣಗಳ ಖರೀದಿಗೆ ಸದ್ಯದಲ್ಲೇ ಸರ್ಕಾರ ಹಣ ಬಿಡುಗಡೆ ಮಾಡಲಾಗಿದೆ ಎಂದು ಸಂಸದ ಬಿ.ವೈ.ರಾಘವೇಂದ್ರ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಂಸದ ರಾಘವೇಂದ್ರ, ವಿಮಾನಯಾನ, ರೈಲ್ವೆ ಮತ್ತು ರಸ್ತೆ ಸಾರಿಗೆ ಕುರಿತು ಪ್ರಮುಖ ಮಾಹಿತಿ ನೀಡಿದರು.

ಪಾಯಿಂಟ್‌ 1 : ವಿಮಾನ ನಿಲ್ದಾಣದ ಕಾಮಗಾರಿ

ಶಿವಮೊಗ್ಗ ವಿಮಾನ ನಿಲ್ದಾಣದಲ್ಲಿ ಮಂಜು ಆವರಿಸಿದ್ದರಿಂದ ಈಚೆಗೆ ಕೆಲವು ವಿಮಾನ ಹಾರಾಟದಲ್ಲಿ ತೊಂದರೆ ಉಂಟಾಗಿದೆ. ವಿಸಿಬಲಿಟಿ ಸಮಸ್ಯೆ ದೂರ ಮಾಡಲು 5 ಸಾವಿರ ಅಡಿಯಿಂದ ರನ್‌ ವೇ ಗೊತ್ತಾಗುವಂತೆ ಮಾಡಲು ನ್ಯಾವಿಗೇಷನ್‌ ಮತ್ತು ಐಎಲ್‌ಎಲ್‌ ಉಪಕರಣ, ಆರ್‌ಎಂವಿ ಸಾಫ್ಟ್‌ವೇರ್‌ ಅಗತ್ಯವಿದೆ. ಈ ಸಂಬಂಧ ವಿಮಾನಯಾನ ಸಚಿವರು, ಅಧಕಾರಿಗಳೊಂದಿಗೆ ಚರ್ಚಿಸಿದ್ದೇನೆ. ರಾಜ್ಯ ಸರ್ಕಾರ ಉಪಕರಣಗಳ ಖರೀದಿಗೆ ಹಣ ಬಿಡುಗಡೆ ಮಾಡುವುದಾಗಿ ತಿಳಿಸಿದೆ. ಜ.15ರ ಒಳಗೆ ನೈಟ್‌ ಲ್ಯಾಂಡಿಂಗ್‌ ವ್ಯವಸ್ಥೆ ಪೂರ್ಣಗೊಳ್ಳಲಿದೆ.

ಪಾಯಿಂಟ್‌ 2 : ಸಿಗಂದೂರು ಸೇತುವೆ

ತಾಂತ್ರಿಕ ಕಾರಣದಿಂದ ಸಿಗಂದೂರು ಸೇತುವೆ ಕಾಮಗಾರಿ ಇನ್ನೂ ಒಂದು ವರ್ಷ ವಿಳಂಬವಾಗಲಿದೆ. ಶರಾವತಿ ಹೊಳೆಯಲ್ಲಿ ನೀರಿನ ಏರಿಳಿತದಿಂದಾಗಿ ಸಾಮಗ್ರಿ ಸಾಗಿಸುವುದು ಕಷ್ಟವಾಗುತ್ತಿದೆ. ಇದೇ ತಿಂಗಳು ಪೂರ್ಣಗೊಳ್ಳಬೇಕಿದ್ದ ಕಾಮಗಾರಿ ಇನ್ನಷ್ಟು ವಿಳಂಬವಾಗಲಿದೆ. ಕೇಂದ್ರ ಸಚಿವ ನಿತಿನ್‌ ಗಡ್ಕರಿ ಅವರು ಶಿವಮೊಗ್ಗಕ್ಕೆ ಭೇಟಿ ನೀಡಿದಾಗ ಕಾಮಗಾರಿ ಸ್ಥಳಕ್ಕೆ ಕರೆದೊಯ್ಯುವ ಇರಾದೆ ಇದೆ.

ಪಾಯಿಂಟ್‌ 3 : ರೈಲ್ವೆ ಕಾಮಗಾರಿಗಳು

ವಂದೇ ಭಾರತ್‌ ರೈಲು ಶಿವಮೊಗ್ಗಕ್ಕೆ ತರುವಷ್ಟು ಮೂಲ ಸೌಕರ್ಯವಿಲ್ಲ. ಆದ್ದರಿಂದ ಬೀರೂರಿನಲ್ಲಿ ವಂದೇ ಭಾರತ್‌ ರೈಲು ನಿಲುಗಡೆಗೆ ಅವಕಾಶ ಕಲ್ಪಿಸಬೇಕು ಎಂದು ರೈಲ್ವೆ ಸಚಿವರಿಗೆ ಮನವಿ ಮಾಡಲಾಗಿದೆ. ಇದರಿಂದ ಶಿವಮೊಗ್ಗದ ಭಾಗದ ಜನರಿಗೆ ಅನುಕೂಲ ಆಗಲಿದೆ. ಶಿವಮೊಗ್ಗದ ರೈಲುಗಳಲ್ಲಿನ ಹಳೆ ಬೋಗಿಗಳನ್ನು ಬದಲಿಸುವುದು ಸೇರಿದಂತೆ ಹಲವು ಮನವಿ ಮಾಡಲಾಗಿದೆ.

ಪಾಯಿಂಟ್‌ 4 : ನಿಲ್ದಾಣಗಳಿಗೆ ಹೆಸರು ಅಂತಿಮ

ಇನ್ನು 15 ದಿನದೊಳಗೆ ಶಿವಮೊಗ್ಗದ ವಿಮಾನ ನಿಲ್ದಾಣದ ಮತ್ತು ರೈಲ್ವೆ ನಿಲ್ದಾಣಗಳ ಹೆಸರು ಅಧಿಕೃತಗೊಳ್ಳಲಿದೆ. ವಿಮಾನ ನಿಲ್ದಾಣಕ್ಕೆ ರಾಷ್ಟ್ರಕವಿ ಕುವೆಂಪು ಅವರ ಹೆಸರು, ರೈಲ್ವೆ ನಿಲ್ದಾಣಕ್ಕೆ ಕೆಳದಿ ಶಿವಪ್ಪನಾಯಕ ಹೆಸರು ಅಂತಿಮಗೊಳ್ಳಲಿದೆ.

ಇದನ್ನೂ ಓದಿ – ಶಿವಮೊಗ್ಗ ಬೈಪಾಸ್‌ ರಸ್ತೆಯಲ್ಲಿ ಹೊಸ ಸೇತುವೆ ಉದ್ಘಾಟನೆ, ವಾಹನ ಸಂಚಾರ ಶುರು, ಹೇಗಿದೆ ಸೇತುವೆ?

ಪಾಯಿಂಟ್‌ 5 : ಮೊಬೈಲ್‌ ಟವರ್‌ಗಳು

ಶಿವಮೊಗ್ಗಕ್ಕೆ 265 ಬಿಎಸ್‌ಎನ್‌ಎಲ್‌ ಟವರ್‌ಗಳು ಮಂಜೂರಾಗಿದೆ. ಏಪ್ರಿಲ್‌ ತಿಂಗಳ ಒಳಗೆ 100 ಟವರ್‌ಗಳನ್ನು ನಿರ್ಮಿಸಬೇಕು ಎಂದು ಸೂಚಿಸಲಾಗಿದೆ.

ಸುದ್ದಿಗೋಷ್ಠಿಯಲ್ಲಿ ಶಾಸಕ ಚನ್ನಬಸಪ್ಪ, ಬಿಜೆಪಿ ಜಿಲ್ಲಾಧ್ಯಕ್ಷ ಟಿ.ಡಿ.ಮೇಘರಾಜ್‌, ಪ್ರಮುಖರಾದ ಎಸ್‌.ದತ್ತಾತ್ರಿ, ಎಸ್‌.ಜ್ಞಾನೇಶ್ವರ್‌, ಶ್ರೀನಾಥ್‌, ರಾಜು ತಲ್ಲೂರು, ಎನ್‌.ಕೆ.ಜಗದೀಶ್‌, ವಿನ್ಸಂಟ್‌, ಬಳ್ಳೇಕೆರೆ ಸಂತೋಷ್‌ ಇದ್ದರು.