SHIVAMOGGA LIVE | 27 MAY 2023

BHADRAVATHI : ಓವರ್‌ ಟೇಕ್‌ ಸಂದರ್ಭ ಕಾರೊಂದು ಬೈಕ್‌ಗೆ ಡಿಕ್ಕಿ ಹೊಡೆದಿದೆ. ಅದೃಷ್ಟವಶಾತ್‌ ಬೈಕ್‌ ಸವಾರರಿಬ್ಬರು ಪಾರಾಗಿದ್ದಾರೆ. ಈ ಹಿಟ್‌ ಅಂಡ್‌ ರನ್‌ ಅಪಘಾತದ ದೃಶ್ಯವು ಮತ್ತೊಂದು ಕಾರಿನ ಡ್ಯಾಶ್‌ ಬೋರ್ಡ್‌ ಕ್ಯಾಮರಾದಲ್ಲಿ (dash cam) ಸೆರೆಯಾಗಿದೆ.

ಹೇಗಾಯ್ತು ಘಟನೆ?

ಕೃಷ್ಣ ಮೂರ್ತಿ ಮತ್ತು ಸಂತೋಷ್‌ ಎಂಬುವವರು ಶಿವಮೊಗ್ಗದಿಂದ ತರೀಕೆರೆಗೆ ಬೈಕಿನಲ್ಲಿ ತೆರಳುತ್ತಿದ್ದರು. ಭದ್ರಾವತಿ ಬೈಪಾಸ್‌ ರಸ್ತೆಯ ಸಿದ್ಧಾಪುರದ ಬಳಿ ಓಮ್ನಿ ಕಾರನ್ನು ಬೈಕ್‌ ಓವರ್‌ಟೇಕ್‌ ಮಾಡುತ್ತಿತ್ತು. ಇದೇ ವೇಳೆ ಐ10 ಕಾರು ಬೈಕನ್ನು ಓವರ್‌ ಟೇಕ್‌ ಮಾಡಲು ರಸ್ತೆಯ ಸಂಪೂರ್ಣ ಬಲ ಭಾಗಕ್ಕೆ ಬಂದಿದೆ. ಎದುರಿನಿಂದ ಮತ್ತೊಂದು ಬೈಕ್‌ ಬಂದಿದ್ದರಿಂದ ಕಾರು ಚಾಲಕ ತಕ್ಷಣಕ್ಕೆ ಕಾರನ್ನು ಎಡಕ್ಕೆ ತಿರುಗಿಸಿದ್ದಾನೆ.

ಇದನ್ನೂ ಓದಿ – ಶಿವಮೊಗ್ಗ – ಭದ್ರಾವತಿ ಮಧ್ಯೆ ಚಲಿಸುವಾಗಲೆ ಬೇರೆ ಬೇರೆಯಾದ ಇಂಟರ್‌ಸಿಟಿ ರೈಲಿನ ಇಂಜಿನ್‌, ಬೋಗಿಗಳು

ಕಾರು ದಿಢೀರ್‌ ಎಡಕ್ಕೆ ತಿರುಗಿ ಬೈಕ್‌ಗೆ ಡಿಕ್ಕಿ ಹೊಡದಿದೆ. ಬೈಕ್‌ ಸವಾರರಿಬ್ಬರು ಕೆಳಗೆ ಬಿದ್ದಿದ್ದಾರೆ. ಬೈಕ್‌ ಸವಾರ ಕೃಷ್ಣಮೂರ್ತಿ ಎಂಬುವವರ ಭುಜದ ಮೂಳೆ ಮುರಿದಿದೆ. ಎರಡು ತಿಂಗಳು ವಿಶ್ರಾಂತಿ ಪಡೆಯುವಂತೆ ವೈದ್ಯರು ಸೂಚಿಸಿದ್ದಾರೆ. ಮತ್ತೊಬ್ಬ ಸವಾರ ಸಂತೋಷ್‌ ಅವರಿಗು ಗಾಯವಾಗಿದೆ.

ಸ್ವಲ್ಪದರಲ್ಲಿ ತಪ್ಪಿತು ದೊಡ್ಡ ಅನಾಹುತ

ಬೈಕ್‌ ಸವಾರರಿಬ್ಬರು ಕೆಳಗೆ ಬಿಳುತ್ತಿದ್ದಂತೆ ಅವರ ಪಕ್ಕದಲ್ಲಿಯೇ ಬರುತ್ತಿದ್ದ ಓಮ್ನಿ ಚಾಲಕ ಕಾರನ್ನು ಎಡಕ್ಕೆ ತಿರುಗಿಸಿ, ಬ್ರೇಕ್‌ ಹಾಕಿದ್ದಾರೆ. ಹಿಂಬದಿಯಲ್ಲಿ ಮೈಸೂರು ಕಡೆಗೆ ತೆರಳುತ್ತಿದ್ದ ಮತ್ತೊಂದು ಕಾರು ಕಡಿಮೆ ವೇಗದಲ್ಲಿ ಬರುತಿತ್ತು. ಇನ್ನು ಎದುರಿನಿಂದ ಲಾರಿಯೊಂದು ಕೆಲವು ಸೆಕೆಂಡ್‌ ತಡವಾಗಿ ಘಟನಾ ಸ್ಥಳಕ್ಕೆ ಬಂದಿದೆ. ಇದರಿಂದ ದೊಡ್ಡ ಅನಾಹುತ ತಪ್ಪಿದಂತಾಗಿದೆ.

ಡ್ಯಾಶ್‌ ಕ್ಯಾಮ್‌ನಲ್ಲಿ ಸೆರೆಯಾದ ದೃಶ್ಯ

ಹಿಟ್‌ ಅಂಡ್‌ ರನ್‌ ಅಪಘಾತದ ವಿಡಿಯೋ ಬೈಕ್‌ ಹಿಂಬದಿಯಲ್ಲಿ ಬರುತ್ತಿದ್ದ ಕಾರಿನ ಡ್ಯಾಶ್‌ ಕ್ಯಾಮರಾದಲ್ಲಿ (dash cam) ಸೆರೆಯಾಗಿದೆ. ಮೈಸೂರಿನ ದೀಪಕ್‌ ಎಂಬುವವರು ಶಿವಮೊಗ್ಗದ ಕಡೆಯಿಂದ ಮೈಸೂರಿಗೆ ತೆರಳುತ್ತಿದ್ದರು. ಅಪಘಾತದ ದೃಶ್ಯ ಡ್ಯಾಶ್‌ ಕ್ಯಾಮರಾದಲ್ಲಿ ಸೆರೆಯಾಗಿತ್ತು. ಭದ್ರಾವತಿ ನ್ಯೂ ಟೌನ್‌ ಠಾಣೆ ವ್ಯಾಪ್ತಿಯಲ್ಲಿ ಘಟನೆ ಸಂಭವಿಸಿದೆ.

WATCH VIDEO